Proxeccións en rede

 Museo Escolar Comarcal do Ortegal (MECOR)

Ao día

Segundo anunciaba na entrada anterior, hoxe mesmo vén de actualizarse a información da ficha do Museo Escolar Comarcal do Ortegal (MECOR), no sitio web que o centro ten reservado no espazo corporativo da Red Mein-PHE, dentro da plataforma electrónica da SEPHE. O camiño continúa e por el andamos.

 

 

Proxeccións en rede

Primeiro trienio na Red Mein-PHE

Museo Escolar Comarcal do Ortegal (MECOR)

Dende febreiro de 2019, o Museo Escolar Comarcal do Ortegal (MECOR), forma parte da Red Mein-PHE (Museos, entidades e iniciativas del Patrimonio Histórico-Educativo), promovida pola Sociedad Española para el Estudio del Patrimonio Histórico-Educativo (SEPHE) e conta cun espazo de seu no sitio web de dita sociedade científica. O MECOR ten a súa sede física no antigo Escolar de San Claudio (Ortigueira), cuxa titularidade correspóndelle, por cesión da colectividade matriz radicada na Habana, á Asociación Centro Cultural Libro Vivo da propia parroquia.

Pupitre e material escolar do MECOR

 

Para máis información ao respecto pode consultarse a mencionada web corporativa e a entrada que nela se ocupa do MECOR. En canto á presenza de Galicia na Red Mein-PHE e os obxectivos programáticos que persegue esta experiencia de integración virtual, tamén pode ser de interese a nota publicada neste blog o 14 de novembro de 2018. En breve disporase de actualizacións do centro museístico de San Claudio, que arestora se atopa en proceso de renovación, catalogación e optimización dos seus ricos, variados e xenuínos fondos patrimoniais para unha exhibición máis idónea, coidada e atractiva dos mesmos ante o público que con asiduidade o visita.

 

Mapa sectorial da Red Mein-PHE

Ficha do MECOR no espazo web Mein-PHE

Semente

Tributos

Entre fondal e cimal

Ás portas xa do novo ano bisesto 2020, solpor dunha década e soleira doutra. Nel conmemoraremos o bicentenario do natalicio de Concepción Arenal. Como preámbulo da efeméride, lembramos un dos seus lúcidos pensamentos, no que acredita con matizados perfís o optimismo educativo sempre presente na súa obra, alén daqueloutros tópicos que o imaxinario da tradición lle veu atribuíndo a ela canda algúns máis pensadores, literatos e estadistas coetáneos. Velaquí as súa palabras, extraídas da obra La instrucción del pueblo, premiada pola Real Academia de Ciencias Morales y Políticas en 1878: 

«Se dice: lo que se gasta en escuelas se ahorra en presidios, en jueces, en soldados; bien está: bueno es hacer economías; pero no es ésa la primera cuestión».

Concepción Arenal por Samaniego. A Habana, 1936